2010年4月19日 星期一

不存於世的時裝品牌




70年代,香港經濟發達,大家開始小康起來,部份人已花得起錢買靚衫,於是一系列時裝品牌,如雨後春筍般出現,大家對它們有無印象,又有無買過著過呢?



70年代,香港著名恤衫品牌,就有這隻 Join - in - Shirt「鍾意恤」,睇下廣告,幾鬼美國化。當年香港電視劇集同廣告,充斥著一片美式潮流,認為美式文化才夠IN。「鍾意恤」的老闆,80年代被廉署拘捕涉嫌貪污,這隻品牌,亦因而消失。


70年代另一隻成衣品牌「BANG BANG」(繽繽時裝),當年這隻時裝品牌,老闆是葉玉卿的哥哥葉志銘,他靠造牛仔褲起家,之後轉做潮流服飾而發達。當年BANG BANG的潮流服,價值不菲,不過潮男潮女,都不介意用成月薪金購買。

BANG BANG這隻品牌,贊助不少電視節目,以助促銷品牌,最出名是TVB節目《BANG BANG咁o既聲》,又出過唱片,又出過即食麵,又拍過電影,泛泛都做。也由於狩獵範疇太廣,以致資金周轉不靈,80年代初,導致BANG BANG賣盤,從此成為歷史名詞。

葉志銘後來搞過北海漁村、橋咀島樂園,最出名當然是力捧葉玉卿梁雁翎的飛圖,賣給楊受成後變成英皇娛樂。1998年,葉志銘的兒子葉崇仁撞車喪生,他之後看破紅塵剃度出家。

70年代的潮流時裝品牌,還有BRITAIN奔騰、浪潮時裝等,有機會再同大家介紹一下。

19 個意見:

2010年4月20日 凌晨1:12 , Blogger Agnes Tse 提到...

我細個去過橋咀島玩.

仲有興發街時期的三SPRIT.

 
2010年4月20日 凌晨1:36 , Blogger 狂徒誌 提到...

我無妳咁幸福呀,個時成日在電視賣廣告,睇個度好正,後尾十幾年前電視影過個度,好荒蕪,好唏噓。

以前細個最有印象品牌係猛龍同APPLE,猛龍仲係EYT搞過「騎術大賽」添。

 
2010年4月20日 凌晨1:42 , Blogger wai 提到...

終於有人記得BANG BANG有出過即食麵喇!!!
我之前同過好多人講過,個個都話我記錯!

 
2010年4月20日 凌晨1:46 , Blogger 狂徒誌 提到...

係有架,我都食過添,好似賣8毫子一包,味道好似同福字面差唔多。

 
2010年4月20日 凌晨1:51 , Anonymous ricky 提到...

I also remember another brand at the 70's : DORS ( very famous for the trendy 熨畫 T-shirt ).

 
2010年4月20日 凌晨1:56 , Blogger 狂徒誌 提到...

呢隻我都知呀,好鬼大美國化,你講起熨畫,我記得當時街邊檔仲有D山寨貨熨畫賣,我阿哥就攞屋企D白色T恤,用熨煲整熨畫T恤

 
2010年4月20日 凌晨4:53 , Anonymous i-Joel 提到...

其實很多洋牌子都是道地的香港製造。Bang Bang 如是,Esprit 如是,有個叫 Wrangler (香港叫威格,台灣叫藍哥)的其實也一樣。

Bang Bang 的即食麵,廣告片與歌是 Sunny 哥哥與「跳飛機」的小演員們合演合唱的。

至於「多文」(Dors),最記得最早期配介紹的是黃霑的煙屎聲。

 
2010年4月20日 清晨6:07 , Blogger Agnes Tse 提到...

有相為證架~ (橋咀島應該都荒廢左)

題外話, 90年代有一間做貨辦貨尾既牛仔褲公司"丹華"出哂名, 可惜97之後隨金融風暴而消失. 前兩年見到旺角街尾有間"丹華", 真係不勝唏噓.

 
2010年4月20日 清晨7:36 , Blogger galaxy 提到...

回憶那些牌子時,更覺名牌都是過眼雲煙。

 
2010年4月21日 凌晨3:28 , Anonymous ricky 提到...

Then I believe most of you still remember the very famous department store "DODWELL" 天祥百貨 , correct ?
Did they all become Mark and Spencer from 90's ?

 
2010年4月21日 上午10:11 , Anonymous 匿名 提到...

還有一個時裝品牌叫"join-in",廣告口號是"join-in,the action jean!"。相當無厘頭。

inanna

 
2010年4月21日 晚上11:04 , Blogger 狂徒誌 提到...

i-joel:70年代是香港時裝業最蓬勃的年代,這些品牌的出現,就是反映那個黃金年代。

這個bang bang面的廣告,我都記得,那時超市賣8毫子一包

agnes: 我都有去丹華買個牛仔褲架,個度d褲真係成個貨倉咁。

galaxy: 現時有不少品牌,將來又可能變成歷史名詞

ricky: 以前的天祥,在旺角亞皆老街都有一間,專賣英國貨,今日的馬莎,已經好少人提

inanna: 我反而記得鍾意恤,個時好似是黃植森賣廣告。

 
2010年4月22日 上午9:39 , Anonymous 匿名 提到...

還有一個:「著起佐丹奴,男人勝在夠風度」。畫面是告東尼騎馬,背後有個美女,今天看認真娘!

inanna

 
2010年4月22日 下午6:54 , Blogger 狂徒誌 提到...

嘩,這個就無印象啦

 
2015年1月17日 晚上8:35 , Anonymous 匿名 提到...

有無人記得天祥啲價錢全部.90 收尾?例如9.90, 10.90 等等

 
2020年6月22日 凌晨4:14 , Blogger Gary Li 提到...

仲有 Dors DQJ, 當年有錢仔穿 Big John, 我地窮仔穿DQJ。

 
2022年9月28日 下午3:45 , Anonymous 匿名 提到...

好記還有免費專線巴士由銅鑼灣載我們到興發街店。

 
2022年9月28日 下午3:47 , Anonymous 匿名 提到...

騎機械牛?

 
2022年12月23日 凌晨3:13 , Blogger et 提到...

有冇多文嘅資料?

 

張貼留言

訂閱 張貼留言 [Atom]

<< 首頁