2010年4月4日 星期日

12安士汽水





我好相信,大家blogger都鍾意飲汽水,有些人更「無汽水不歡」,原來香港大學教務長韋永庚教授,每日起碼要飲一罐可樂,嘩,真誇張。

在香港,70年代,除「可口可樂」和「百事可樂」之外,原來製造荳奶製品聞名的「維他奶」,也出過「維他汽水」。維他汽水是讀小學時期,合作社小賣部必有得賣,這款式的玻璃樽,同這些扯得開的樽蓋,已經再找不到,當年賣六毫子一支,都算抵飲,那時由尖沙咀碼頭搭1A巴士往秀茂坪,只需4毫子。

自己童年時家境好窮,根本是無零用錢買零食,有得買零食,都要等農曆新年。每當體育堂完畢後,就見著同學有得飲汽水,自己無,只有飲水,想到一個字,就是「恨」。

這款「維他汽水」,在80年代初的電視廣告都會聽到


我擁有這本維他奶慶祝七十周年的非賣品「人情味 - 維他奶70年」,竟然沒有一個字記載維他汽水歷史,真奇怪。

今日的「維他汽水」,已經換成維他奶樽,以前在樂富中心某間大排檔,食車仔麵都會送支維他汽水,這間大排檔當然已執笠。


同一款樽裝的是「玉泉汽水」,當年一句「靜靜地再起革命」,由李龍基主唱的「靜靜地」改編而成,好多人都會識唱。不過,這款汽水貴過維他汽水,十二安士就要一元。同維他汽水一樣,有三款味道,即可樂、橙汁及忌廉。玉泉忌廉最出名,細過飲的「忌廉溝鮮奶」,都是用玉泉汽水,自己未飲過忌廉溝鮮奶,好多人話飲完之後會肚痛,所以不敢試。

玉泉汽水,除忌廉出名,還有羌碑,非常好飲。

玉泉汽水,其後被香港太古汽水廠收購,同雪碧、芬達,成為可口可樂旗下品牌汽水之一,好多可口可樂汽水機,都會有罐裝玉泉忌廉。

12公升樽裝汽水,已成為我們的集體回憶,大家只能在圖片才能見到。

20 個意見:

2010年4月4日 晚上9:34 , Blogger Agnes Tse 提到...

忌廉溝鮮奶幾好飲呀! 忌廉有忌廉, 奶有 奶味, 哈哈!

 
2010年4月4日 晚上9:41 , Blogger 狂徒誌 提到...

我唔係幾敢飲,因為怕個胃,驚肚痛,d人話識溝就無嘢,但唔知點溝法

 
2010年4月5日 凌晨2:35 , Blogger Pucca 提到...

我對呢隻氣水都有啲印象,不過個樽大肥,唔係幾好揸。

 
2010年4月5日 凌晨2:53 , Blogger 狂徒誌 提到...

當年讀個間小學,只有呢隻維他汽水賣,去到中學,只有細樽裝的可口可樂

 
2010年4月5日 清晨5:11 , Anonymous i-Joel 提到...

狂徒君:
以前玉泉和七喜兩種汽水,在香港都是有一間叫「聯合」的汽水廠製造的。
小時候看「雙星報喜」,時常會見到許多拉長縮短的七喜及玉泉瓶子,後來才知道,它們和無記都是同一個老闆:利孝和。

12安士矮瓶汽水,我小時候都有飲。麻煩在兩件事:開蓋要扯得有技巧,否則斷了鎖匙圈,要動用鉗子才行;其次是要托底,因我手指稍微短些。

今日要飲維他汽水,大概還是要去大家樂、大快活吧?(都是維他奶創辦人的後人開的)

至於忌廉汽水,現在對我來說已經太甜。

 
2010年4月5日 清晨5:19 , Anonymous i-Joel 提到...

狂徒君:
再轉你一篇文章:可口可樂中國歷險記:賣汽水驚動政治局。
http://www.torontoservice.com/News/Talk/2009/03/20/00582718941.html

若非這篇文,我也不知可口可樂有中藥成份哩!

 
2010年4月5日 清晨6:01 , Blogger Wordy 提到...

忌廉溝鮮奶好香好滑,但上一次飲已經是三四年前的事,在保良局附近的一所咖啡廳。

我小學時畫水彩畫,用這種汽水瓶盛 2/3 清水來洗畫筆

 
2010年4月5日 清晨6:37 , Blogger 狂徒誌 提到...

i-joel: 唔怪得以前tvb好多節目,都有玉泉汽水贊助,就這原因。

我讀小學時,這款12安士維他汽水已經較容易開,一拉就ok。

總發覺,在大家樂飲的可樂,同麥當勞飲的味道有點不同,可能真是維他汽水,我以前在樂富食飯,某間大排檔,現時已經沒有存在,因為已被領匯勒令停業,他們食車仔麵,是附送一支維他汽水,已經用維他奶的玻璃樽。

我都是喜歡飲雪碧,因為不會太甜。

自己總想想,如果北韓有朝一日可公開發售可口可樂,就證明這個鐵幕國家真是變天。

wordy: 真是好想試一次忌廉溝鮮奶,想試下那種味道如何,又怕自己個胃受不住。

以前飲完這些汽水樽,真是唔知點用,一係劈落垃圾桶,一係劈落學校合作社門口,佢地些校工會收

 
2010年4月5日 上午10:35 , Blogger Agnes Tse 提到...

狂徒兄, 將忌廉倒入鮮奶就得. 你怕攪肚痛就放少d忌廉.

 
2010年4月5日 下午5:21 , Blogger 狂徒誌 提到...

agnes: 咁真係試下先

 
2010年4月5日 下午6:27 , Blogger sunlam 提到...

我讀小學放學後, 都間中去士多買汽水外賣, 怎樣外賣? 係用透明膠袋加支飲管, 唔駛按樽錢, 正呀!!

 
2010年4月5日 晚上7:53 , Blogger 狂徒誌 提到...

sunlam: 真係好正

 
2010年4月7日 凌晨1:12 , Blogger 易堯文 提到...

12安士真係冇點見架啦...舊陣時冇汽水不歡,家陣已經少飲。

話時話我地舊時鍾意既野...好多大個都唔鍾意lu

 
2010年4月7日 凌晨1:23 , Blogger 狂徒誌 提到...

大家童年時都係無汽水不歡,但以前屋企窮,起碼要每星期日,屋企先至買一支1公升,之後係1.25公升膠樽汽水,那時四兄姊飲汽水,非常happy。

呢隻維他12公升汽水,係我讀小學食物部獨家發售的汽水,讀中學呢,就係可口可樂細樽裝汽水。

 
2010年4月7日 凌晨3:04 , Anonymous 十一劃生 提到...

飲『忌廉溝鮮奶』之後肚痛,可能喺有啲人根本唔飲得牛奶。記得第一次聽到『忌廉溝鮮奶』這種飲品是一套港產電影,有關父子情的,狂徒兄記得是哪一套嗎?

 
2010年4月7日 凌晨3:09 , Blogger 狂徒誌 提到...

未就係胡楓、李燕燕、艾迪、嚴秋華個套《忌廉溝鮮奶》咯,呢套嘢亞記好多年前下午播過一次,記得嚴秋華屋企成堆咸書。

 
2010年4月15日 晚上9:53 , Anonymous i-Joel 提到...

狂徒君:
剛才看到這篇 blog:
http://edwinor.blogspot.com/2010/04/vs.html
港式快餐在香港也有近半世紀的歷史了。請問狂徒君可會考慮來一篇?

 
2010年4月30日 下午5:29 , Blogger tac 提到...

seems no more 維他汽水 loo...... last time I can see was from PolyU's tuck store

 
2012年1月27日 上午8:28 , Anonymous 匿名 提到...

未知閣下如何得到此書?如蒙賜告,不勝銘感。


我擁有這本維他奶慶祝七十周年的非賣品「人情味 - 維他奶70年」,竟然沒有一個字記載維他汽水歷史,真奇怪。

 
2018年12月6日 上午11:48 , Blogger Fragile 提到...

各位大哥大姐,

我係西門兄.或許我可試解答你們的各種汽水問題!可電郵:
bottlemania@netvigator.com

Best Regards

西門

 

張貼留言

訂閱 張貼留言 [Atom]

<< 首頁