2010年5月8日 星期六

1976年家計會給成年人的一封公開信





以上廣告,並非「咸濕」,實是家計會1976年在報章刊出全版廣告,名為「香港家庭計劃指導會給全港成年男女的一封公開信」,裡面講述很多有關避孕丸、子宮環使用、絕育手術等問題,一一解答,是一個正確的性教育廣告,也是今日性教育參考一篇重要文獻教材。

(圖: 1936年7月31日香港《華字日報》)

香港家庭計劃指導會成立於1936年,前身為「香港優生指導學會」,1950年才改此名。70年代,香港青年性教育知識缺乏,好多學生哥與女生「偷嘗禁 果」,出現好多「未婚媽媽」,或者非法墮胎的情況。另外,港人都是一家多子多女,以及「抵壘政策」還未取消,以致香港人口爆棚。



家計會的任務,是為香港人 推廣正確的性知識,為不育夫婦提供生育輔導,婦女驗身檢查等。家計會的廣告:「兩個就夠晒數」,港人耳熟能詳,未聽過,去youtube搵下啦。不過,我 們特首曾蔭權提倡香港人生三個,咁家計會的標誌是否要改一改呢? 同時,家計會有男子捐精服務。許冠文的「蓋世英雄」曾拿來搞笑過,勁搞笑,大家不妨租碟或買碟看看。

7 則留言:

TT震講乜啫 提到...

兩個就夠哂數, 首歌係咪葉麗儀唱?

readandeat 提到...

我還記得那首「兩個就夠晒數」的歌,廣告中有一個男人好以漁民咁打扮。

那時候家家都生三四個,我鄰居就生六個七個的。

wai 提到...

仲有句口號,家庭計劃,要做得哥!

十一劃生 提到...

我記得好似關德興都拍過家計會的宣傳廣告

ricky 提到...

《兩個夠哂數》 was sung by 仙杜拉.
Actually the lyrics was written by 霑叔 , and many years ago in an interview he mentioned that the original lyrics was written as "追得到也未必好 追唔到呢 生壞個老母" - so funny !!
But of course, it 's not appropriate for government campaign .
The man who rowed the boat with many kids was " 順叔" ( in《香港8x》series).

readandeat 提到...

ricky:

真的?幾搞笑。

後來歌詞變成:

追得到也未必好 追唔到呢 生壞肚。

好似不是順叔呀,瘦啲的。成日做埋街坊路人甲之類的。

狂徒誌 提到...

tt震: 唔係,在ricky兄的提醒下,係仙杜拉主唱,黃霑填詞,夠晒簡單直接,呢個鬼才,真係好難搵到

readandat: 當時香港缺乏控制人口的政策,香港呢個彈丸之地,來咗咁多細路哥,搞到好多交通、房屋等問題,香港在生育政策,尚算成功,反而在大陸,俾馬寅初呢套害人不淺的經濟政策,搞咩嘢一孩強迫政策,搞到男女失衡,你話啦,邊有咁多女仔同男仔交配呢?

仲有一個廣告,係鄭少秋唱的,搵盧大偉扮老豆,廣告歌詞;「一班兒女債,計都計唔晒,兩個奏到大,生活更愉快,生仔唔駛煩,一切安樂晒,兩個避孕唔再生,一次搞掂晒」

wai: 呢個廣告,曾出過短時期,扮老豆個個係秦煌

十一劃生同ricky: